पुणे शहरातील पर्यावरण संवर्धन आणि जलसुरक्षेला मिळणार मोठी गती

पुणे शहरातील पर्यावरण संवर्धन आणि जलसुरक्षेला मिळणार मोठी गती

पुणे दि. ७ (प्रतिनिधी) : भारतातील अव्वल पर्यावरण संवर्धन संस्थांपैकी एक असलेल्या 'से ट्रीज' (SayTrees) या संस्थेने पुण्यातील वडगाव बुद्रुक येथील सुखकर्ता ट्रेनिंग इन्स्टिट्यूटजवळ आपल्या नव्या पूर्णवेळ प्रादेशिक केंद्राचे भव्य उद्घाटन केले आहे. महाराष्ट्रातील पर्यावरण पुनरुज्जीवन, जलसुरक्षा आणि समुदाय-चलित शाश्वत उपक्रमांना मोठ्या प्रमाणावर विस्तारण्यासाठी हा टप्पा अत्यंत महत्त्वपूर्ण मानला जात आहे.

या धोरणात्मक विस्तारामुळे स्थानिक समुदाय, महापालिका प्रशासन, कॉर्पोरेट भागीदार, संरक्षण आस्थापना आणि शैक्षणिक संस्थांसोबत भागीदारी करण्याची 'से ट्रीज'ची क्षमता अधिक मजबूत होणार आहे. संस्थेने आतापर्यंत पुणे क्षेत्रात उल्लेखनीय कामगिरी केली असून, एसटीपी कासरवाडी, आकुर्डी, कोडित खुर्द आणि नॅशनल डिफेन्स अकॅडमी येथे चार शहरी मियावाकी जंगलांच्या माध्यमातून ५७,९५० पेक्षा जास्त रोपांची लागवड केली आहे. याशिवाय, प्रादेशिक जलसुरक्षा सुधारण्यासाठी आणि जल परिसंस्थेचे पुनरुज्जीवन करण्यासाठी पुरंदर, बारामती आणि केंदूर येथे १८ तलाव पुनरुज्जीवन प्रकल्प यशस्वीरीत्या राबवले आहेत.

संस्थेचे सह-संस्थापक आणि मुख्य कार्यकारी अधिकारी देवकांत पयासी यांनी सांगितले की, "पुण्यातील नव्या कार्यालयामुळे आम्ही ज्या समुदाय आणि संस्थांची सेवा करतो, त्यांच्याशी थेट जोडले गेलो आहोत. यामुळे येत्या काळात महाराष्ट्रात पर्यावरण पुनरुज्जीवन, जलसंरक्षण आणि हवामान बदलाचा सामना करण्यासाठी आमचे काम अधिक वेगाने पुढे नेण्यास मदत होईल."

तसेच संरक्षण आणि शासकीय प्रकल्पांच्या प्रमुख वंदना तुम्मलापल्ली यांनी नमूद केले की, "मोठ्या आणि अधिक प्रभावी हरित प्रकल्पांची अंमलबजावणी करण्यासाठी हे केंद्र सरकार आणि संरक्षण क्षेत्रातील भागधारकांशी असलेला आमचा संपर्क सुलभ करेल."

अ‍ॅग्रोफॉरेस्ट्री आणि ग्रामीण विकास प्रकल्पांचे प्रमुख महीधर रेड्डी एस. यांच्या मते, या ऑन-ग्राउंड उपस्थितीमुळे प्रकल्प अंमलबजावणी जलद होईल. कृषी-वनीकरण आणि शाश्वत जमीन पुनरुज्जीवन उपक्रमांचा विस्तार करून शेतकरी आणि ग्रामीण समुदायांची उपजीविका सुधारणे व जैवविविधता वाढवणे हे संस्थेचे मुख्य उद्दिष्ट आहे. हे नवे कार्यालय वडगाव बुद्रुक येथील जाधव नगरमध्ये कार्यरत झाले आहे.