पुण्यात ‘घुमर गरबा’चा जल्लोष! निया शर्मा आणि निशाद भोईर यांच्या उपस्थितीने सोहळ्यात रंगत

पुण्यात ‘घुमर गरबा’चा जल्लोष! निया शर्मा आणि निशाद भोईर यांच्या उपस्थितीने सोहळ्यात रंगत

पुणे, २० ऑक्टोबर : पुण्यात १७ आणि १८ ऑक्टोबर रोजी आयोजित करण्यात आलेल्या ‘घुमर गरबा’ या दोन दिवसीय उत्सवाला पुणेकरांचा उत्स्फूर्त प्रतिसाद मिळाला. संगीत, नृत्य आणि संस्कृतीचा सुरेख संगम असलेल्या या सोहळ्याला अंदाजे ६ ते ८ हजार नागरिकांनी उपस्थिती लावल्याचा अंदाज आहे. गरब्याच्या तालावर थिरकत पुणेकरांनी या उत्सवाचा मनमुराद आनंद लुटला.

लोकप्रिय टेलिव्हिजन अभिनेत्री निया शर्मा हिच्या उपस्थितीने कार्यक्रमात विशेष रंगत आली. पुणेकरांच्या उत्साहाचा अनुभव घेत तिने गरबा सोहळ्याचा आनंद लुटला. तसेच मराठी अभिनेता निशाद भोईर यानेही या उत्सवात सहभाग घेतला. यावेळी त्याच्या आगामी ‘गोंधळ’ या मराठी चित्रपटाचा ट्रेलर उपस्थितांसमोर सादर करण्यात आला. चित्रपटाच्या ऑस्कर स्पर्धेतील कथित सहभागामुळे चित्रपटप्रेमींमध्येही उत्सुकता निर्माण झाली.

स्थानिक कलाकारांना मिळाले हक्काचे व्यासपीठ

केवळ मनोरंजनापुरता मर्यादित न राहता, ‘घुमर गरबा’ने स्थानिक कलाकारांना प्रोत्साहन देण्याचा उपक्रमही राबवला. सिनेक्सिस सिनेमॅटिक कंपनीचे संचालक बिपुल जोसेफ आणि प्रियांका दुबे यांनी स्थानिक कलागुणांना मोठ्या प्रेक्षकांसमोर सादर करण्यासाठी विशेष व्यासपीठ उपलब्ध करून दिले.

या दोन दिवसीय सोहळ्यात सहा स्थानिक नृत्यगटांनी आपली कला सादर केली. त्यांच्या सादरीकरणाने कार्यक्रमात उत्साह आणि वैविध्य निर्माण झाले. या कलाकारांच्या योगदानाची दखल घेत बिपुल जोसेफ आणि प्रियांका दुबे यांच्या हस्ते सहाही नृत्यगटांचा सन्मान करण्यात आला.

चित्रपटसृष्टीतील कलाकारांची उपस्थिती, मराठी चित्रपटाचा ट्रेलर आणि स्थानिक कलाकारांना मिळालेली संधी यामुळे ‘घुमर गरबा’ हा केवळ सांस्कृतिक उत्सव न राहता मनोरंजन आणि स्थानिक कलागुणांना प्रोत्साहन देणारा उपक्रम ठरला. संगीत, नृत्य आणि संस्कृतीच्या माध्यमातून पुणेकरांना एकत्र आणत या सोहळ्याने सामूहिक उत्सवाचा आनंद द्विगुणित केला.